പഴുത് :: അനിത ഹരി

അടഞ്ഞ മനസ്സിലാകെ വിരലുകൾ പരതി

ഓർമ്മപ്പഴുതെവിടെ മറഞ്ഞു ?

ഉടഞ്ഞ മനസ്സുമായി പിന്നെയും മിഴി നട്ടു

കാലം കൈവീശി കടന്നു പോയോ ?

കടവിലേയ്ക്കുനോക്കി നിശ്വാസം പൂണ്ടു

വരണ്ട മണലുകൾ മനം പൊളിച്ചുവോ?

പവിഴപ്പുറ്റുകൾ ചില്ലകളുടച്ചു കരഞ്ഞു

ജലപ്പരപ്പ് ശ്വാസം മുട്ടി മരിച്ചുവോ ?

കനിവിന്റെയേതോ കോണിലൊരു ദൈന്യ മുഖം

മുറിവേറ്റു പിടഞ്ഞു വിലപിക്കുന്നുവോ ?

ചിതലരിച്ച ചിന്തകൾ ശല്ക്കം പൊട്ടിച്ചു

ഉടലൊടിഞ്ഞു പോയ ചിറകുകളോ ?

നിഴൽ മുറിഞ്ഞൊഴുകിയ രക്തപ്പുഴകൾ

പ്രണയമോഹത്തിന്റെ പുലരി തീർക്കുമോ ?

അനിത ഹരി