തുടിച്ചിടും ദിനംവരെന്-
തപസ്സിനേകമൂര്ത്തി-
യെന്റെ ഭാരതാംബയാകണം
വിപത്തിലും വെടിഞ്ഞിടാത്ത
തീവ്രദീക്ഷയില് സ്വയം
തപിച്ചെരിഞ്ഞതാണു നിന്റെ
ജീവിതം സമുജ്ജ്വലം...
ക്ഷണം ക്ഷണം പഥങ്ങളൊക്കെ
ദുര്ഗ്ഗമങ്ങളാകിലും
പിണങ്ങിമാറിയുറ്റവര്
സഖാക്കളും മറക്കിലും
തുണച്ചു ധ്യേയപൂര്ത്തി കൈ-
വരിക്കുവാനൊരുള്ക്കരു-
ത്തുണര്ത്തിടും മഹസ്സു നിന്റെ
ജീവിതം സമുജ്ജ്വലം...
പടയ്ക്കൊരുങ്ങി സേനകള്
നിരന്നു മുന്നിലെത്തവെ
പിടഞ്ഞൊളിക്കുമര്ജ്ജുനന്റെ
ശങ്ക തീര്ത്ത ശംഖമായ്
അടര്ക്കളത്തിലഗ്നി ചിന്നു-
മായിരം യുവാക്കളില്
പടര്ന്നു കത്തിടുന്നു നിന്റെ
ജീവിതം സമുജ്ജ്വലം...
അഹിംസയേകമാര്ഗ്ഗമെന്ന
ബുദ്ധി നീ തെളിച്ചതും
അസത്യമല്ല സത്യമാണു
ദൈവമെന്നുരച്ചതും
അപാരശക്തിയാര്ന്നു
ഭൂവിനേകിടുന്നു സാന്ത്വനം
അഭൗമസൂര്യകാന്തി നിന്റെ
ജീവിതം സമുജ്ജ്വലം....
--- രജി ചന്ദ്രശേഖർ