Raji Chandrasekhar :: നമ്മളൊന്നെന്ന മിഥ്യ

Views:

 

നമ്മളൊന്നെന്ന മിഥ്യ

 

പട്ടുപാവാട തെല്ലൊന്നൊതുക്കി നീ,

ഒട്ടു വേഗത്തിലേറുന്നു ഗോവണി.

വാനതാരകം കൺചിമ്മി നോക്കി നിൻ

മൗനരാഗം തുടുക്കും കവിൾത്തടം.

 

സ്വർണ്ണനാരുകൾ മൂടാത്ത കാലടി-

വർണ്ണമന്നു ഞാൻ കണ്ടതും, നീൾമിഴി-

ക്കോണിൽ നാണക്കുരുന്നു പൂവിട്ടതും

വീണമീട്ടും ചിരിക്കിണുക്കങ്ങളും,

 

ഓർക്കുവാനില്ല കാരണം, കാഴ്ചകൾ

പാർക്കു ചെയ്യുമെൻ ബോധസെല്ലാറിലും

നേര്, നീയില്ല ഞാനുമില്ലാരുമി-

ല്ലോരുവാൻ നമ്മളൊന്നെന്ന മിഥ്യയും.

Raji Chandrasekhar

https://www.amazon.in/dp/B08L892F68